கவிஞர் இசை

   அ ந்திக்குள் புகுந்து செல்லும் மோட்டார் சைக்கிளோடு பிறந்தேன். அணில் கூட்டத்தோடு பிறந்தேன். மொட்டைமாடியோடு பிறந்தேன். கம்பர்கட்டோடு பிறந்தேன். ஓணத்துச் சேலையோடு பிறந்தேன். எப்படி எப்படியோ சொன்ன பிறகும் எஞ்சி நிற்கும் நதிகளோடு பிறந்தேன். தப்பட்டைக் குச்சியோடு பிறந்தேன். 'ஒளவை' என்கிற தெய்வத்தொடு பிறந்தேன். கால்களிடையே மிட்டாயோடு பிறந்தேன். 'செகவ்'வோடு பிறந்தேன். துளசி மணத்தோடு பிறந்தேன். " வித்தும் இடல் வேண்டா புலத்தொடு" பிறந்தேன். உலகைச் சின்னதாக உருட்டித் தந்த கிரிக்கெட் பந்தோடு பிறந்தேன். " சே 'வின் சுருட்டைப் புகைத்தபடியே பிறந்தேன். தைலமாகும் விரல்களோடு பிறந்தேன். என்னவென்றறியா வானொடு பிறந்தேன். கொடல்வத்தலோடு பிறந்தேன் 'ராஜாவோடு ' ராஜாவாகப் பிறந்தேன். புலரியை மீட்டும் புள்ளொடு பிறந்தேன். இந்தப் பொற்கணத்தில் இப்படிச் சொல்ல விரும்புகிறேன்.. இந்தத் தாயிற்கும்  இந்தத் தந்தைக்குமல்ல தாயொடும், தந்தையொடும் பிறந்து வந்தேன்.

  கோ டையைச் சமாளிக்க இளநீர் பருகலாம். லெமன் ஜூஸ்சோ, பியரோ அருந்தலாம். நாளொன்றுக்கு நான்கு முறை நீராடலாம். மண்பாண்டங்களுக்கு மாறலாம். குளிர்சாதனப் பெட்டிக்குள் ஒளிந்து கொள்ளலாம். கொசுப்படைக்குத் துணிந்து மொட்டை மாடிகளில் தஞ்சமடையலாம். ஏ.சியைக் கூட்டி வைக்கலாம். மின்விசிறிகளை 50- ல் சுழல விடலாம். ஆணென்றால் மேலாடையைக் கழற்றி விடலாம். பெண்னென்றால் உள்ளாடைகளைத் தீயிட்டுக் கொளுத்தலாம். மலைப்பிரதேசங்களுக்கு ஓடவோ அருவிகளை நாடவோ செய்யலாம். நீ மட்டும் உள்ளே வற்றி உலராமல் இருந்தால் கவிதையும் எழுதலாம்.

என் வாழ்வில் நான் கண்ட பெரும் தொற்று நோய் இந்த கொரோனோ தான். "பிளேக்"  பற்றி பாட்டி சொல்லிய கதைகள் உண்டு. எங்கள் ஊரின் கோடியில் " பிளேக் மாரியம்மன் " என்று ஒரு அம்மன் உண்டு. அவள் அந்த நோயிலிருந்து மக்களைக் காத்தவளாக இன்றும் வணங்கப்படுகிறாள்.  எய்ட்ஸ் வந்த போது நிலவிய அச்சம் ஒரு கட்டுக்குள் இருந்தது. அதன் காரணங்கள், பரவும்விதம் போன்றவை மருத்துவ வல்லுநர்களால் தெளிவாக முன் வைக்கப்பட்டன. அது கொரோனோவைப் போல மொத்த ஜனத்திரளையும் அச்சுறுத்தவில்லை. ஆனால் கொரோனோ நோய் குறித்த குழப்பங்கள் இன்றளவும் தீர்ந்தபாடில்லை.     ஒரே அறையில்  10 நாட்களுக்கும் மேலாக ஒன்றாகத் தங்கியிருந்து,  குலாவி மகிழ்ந்த இருவருள் ஒருவருக்கு ' பாசிட்டிவ்'. ஒருவருக்கு 'நெகடிவ்'. இத்தனைக்கும் இரண்டு நாட்களுக்கு முன்தான் மிக நீண்ட வரிசையில் நின்று பெற்ற மதுவை , அவசத்திற்குக் கிட்டிய ஒரே டம்ளரில் இருவரும் பங்கிட்டுக் குடித்திருக்கிறார்கள். மருத்துவ உலகம் " immunity" என்று சொல்லும் காரணத்திற்கு ஏற்ப பாசிட்டிவ் காரருக்கு சர்க்கரை வியாதி இருந்தது. ஆனால் இப்படியான எந்தத் தர்க்கத்துக்குள்ள...

  உ ன்னை விடவும் உன் உடல் கருணை மிக்கது. அருள் பூண்டது. உன்னைவிடவும்  உன் உடல் இதயப்பூர்வமானது. பொய்யுரைக்க நாணுவது. உன்னைவிடவும் அது கவித்துவமானது. நறுமணம் கமழ்வது. உன்னைவிடவும் அது இதமானது. பளிங்கு போன்றது. உன்னைவிடவும் அது அகந்தை அழிந்தது. அழகு பூத்து  உறங்குவது. உன்னைவிடவும் அது ஊழலில் குறைந்தது. தில்லுமுல்லுகளில் விருப்பமற்றது உன்னைப்போன்று  கணக்குகளில் சமத்தன்று அது எளிதாக ஏமாறுவது உன்னைப் போன்று ஊர்வதன்று அது பறப்பது. உன்னை விடவும் உன் உடல் கருணை மிக்கது. அருள் பூண்டது. மேலும் கண்ணீரைக் காணச் சகியாதது. நீ மட்டும் அடிக்கடி அதன் காதைப் பிடித்துத் திருகாதிரு! மீதியை அதனிடம் நான் பேசிக் கொள்கிறேன்.