கவிஞர் இசை

இ ந்தத் தனியறைக்குள் கொஞ்சம் கோப்பையை நிரப்பி ஆண்ட்ராய்டு போனோடு  ச்யர்ஸ் சொல்கையில் செத்து மிதக்கிறது நம் மது. நமது ஏகாந்தங்கள் களியாட்டங்கள் தாறுமாறான பாடல்கள் கண்ணீரில் ஊறிய சோபா செட்கள் திடீர் திருப்பங்களில் நிகழும் அடிதடிகள் எல்லாவற்றையும் எவனோ ஒருவன் துவரப் பெருக்கி பூமிக்கு வெளியே தள்ளிவிட்டான். நமது அறையிலிருந்து கோபித்துக் கொண்டு கிளம்பும் ஒருவனைப் போல மகிழ்ச்சி ஆவேசமாக படியிறங்கிப் போவதைப் பார்!  இப்போதே புரிகிறது போதை உனது கோப்பையிலிருந்துதான் எனது தலைக்கு ஏறியிருக்கிறது. உண்மையில் நாம் மதுவை காய்ச்சித்தான் குடித்திருக்கிறோம் நண்பா! (மிஷ்கினுக்கும், சாம்ராஜிற்கும்)

   கா ரை நிறுத்தி வழி கேட்டாள். மங்கள நிகழ்ச்சிக்கு போகிறாள் போல. ' மங்களம் 'என்றிருந்தாள். தெளிவாகப் புரிந்த பின்னும் கூடுதலாய் கொஞ்சம் கேட்டாள். தெளிவாகச் சொல்லிய பின்னும் கூடுதலாய் கொஞ்சம் சொன்னேன். காரைவிட்டு இறங்கி நாளெல்லாம்  என்னோடே திரிகிறாள் அவள். காரில் ஏறி ஊரெங்கும் பயணம் போகிறேன் நான்.

  மா லை வழியே நடந்து நடந்து நடந்து நடந்து வானத்திற்கே வந்துவிட்டேன்.

  அ தன் நறுநெடியோ என்னை மூக்கைத் துளைக்கிறது. ஆனால் அந்த சின்னஞ்சிறு நீலமலர் பள்ளத்தாக்கின்  அதி ஆழத்தில் உள்ளது எனில் மணப்பது எதுதான்? நான்தான்.

1. தா வாங்கட்டையில் அணிந்திருக்கும் நைந்த மாஸ்க்கோடு அந்த சின்ன கிராமத்திற்குள் நுழைகிறான்  கிளி ஜோசியக்காரன் முதல் தெருவில் ஒரு பிணம் விழுந்துள்ளது "தளபதி சக்திவேல்" காலமாகிவிட்டார். கெத்தாக வாழ்வதற்கு கெத்தான பெயர் அவசியம்தான். நேற்று   தளபதியும் சக்திவேலும் மடிந்துவிட்டனர். கிளி ஜோசியக்காரன் யாரையும் அதிர்ஷ்டம் பார்க்க அழைக்க வில்லை. கிளி அழைக்கிறது. அவன் அதை  அதட்டி அடக்குகிறான். இரண்டாவது,  மூன்றாவது என அடுத்தடுத்த தெருக்களிலும் அவன் யாரையம் அழைக்கவில்லை. கிளி அழைத்தது அவன் அதட்டினான். 9 வது தெருவில் அவன் அழைக்கவில்லை அதுவும் அழைக்கவில்லை. கிளிக்கு என்னவோ புரிந்துவிட்டது. ஆனால் எதுவும்  புரியவில்லை. 2.                     வெயில் அள்ளிக் கொட்டியது. ஒரு மாடிவீட்டு நிழலில் நின்று பீடியைப் பற்றவைத்தான் கிளி ஜோசியக்காரன். கிளி ஜோசியம் ஒரு விளையாட்டாகி காலங்கள் ஆகிவிட்டன அடுத்து என்ன செய்யலாம் என்று யோசித்தான். அவனுக்கு இதுபோல் விளையாட்டாகத்தான் ஏதாவது செய்ய வரும்.                      

ஒ ரு வருடம் கூட தவறியதில்லை மே வரவர மே ஃப்ளவரும் வந்து கொண்டிருக்கும் போல இன்று அப்புதிய விருந்தாளியைச் சந்திக்கப் போனேன். அது போனதற்கும் வந்ததற்கும் இடையே இந்த உலகில் எவ்வளவோ துக்கங்கள் நடந்து முடிந்து விட்டன. ஒன்றைக் கூட அதனிடத்தே சொல்லவில்லை நான்.

    ந மது மாலை நேரத் தேநீர்களின் தலையில் இடி விழுந்துவிட்டது. அது  ஒரு நாளின் அழகான நிறுத்தம் வீடொடுங்கும் முன்னே உலகத்தை ஒரு முறை சுற்றி வருவது சமயங்களில் அது ஓய்வின் இனிமை ஒரு தடகளவீரன்  தனது நெடிய பயிற்சிகளின் முடிவில் ஊற்றெடுத்து வரும் வியர்வைப் பெருக்கை வழித்தெறிந்து சிரிக்கும் சிரிப்பு வானத்தின் ஜாலங்களைப் பார்த்தபடியே டம்ளரில் வாய்வைத்து அந்தியை உறிஞ்சுவேன். அந்தியை உண்டவன் அவ்வளவு சீக்கிரம் இருண்டு விடுவதில்லை. வானத்தின் கீழ் செய்யப்படும் எந்தவொரு காரியத்திலும் வானமும் கொஞ்சம் கலந்துவிடுகிறது. வீடுகளில் தரமான முறையில் தயாரிக்கப்படும் சுவைமிகு தேநீரில் வானம் இருப்பதில்லை.