பீடி மணக்கும் உன் உதட்டிற்கு ஒரு முத்தம்

திடும்.. திடும்.. திடும்.. திடும்..

த்துடுடும்.. த்துடுடும்.. த்துடுடும்.. த்துடுடும்..

த்துடுடுடுடும்.. டுடும்.. த்துடுடுடுடும்.. டுடும்..

த்துடுடும்.. த்துடுடும்.. த்துடுடும்.. த்துடுடும்..

த்துடுடுடுடும்.. டுடும்.. த்துடுடுடுடும்.. டுடும்..

திடுமு உறுமியதில் மனத்துக்கண் விழித்துக் கொண்டது.

தப்பட்டையும் பலகையும் சேர்ந்து

அணைந்து கிடந்த உயிரில் வாய்வைத்து ஊதின.

ஒரு நிமிடம் போதும் ….

காலில் சலங்கையை ஏற்றிவிட்டு

தலையில் ஒரு ஈரிலைத்துண்டை சுற்றிக்கட்ட ..

ஆனாலும் அது இயலாது

ஏனெனில் நான் ஒரு கனவான்

ட்டுடுடுட்டும்… ட்டுடுடுட்டும்…

டுட்டூ.. ட்டு… டூ… டுடும்

ட்டுடுடுட்டும்… ட்டுடுடுட்டும்…

டுட்டூ.. ட்டு… டூ… டுடும்..

கனவானுக்கு மறுக்கப்பட்ட களியாட்டத்தின் முன்

கால்களை இறுக்கிக்கொண்டு

நவண்டைக் கடித்த படி நிற்கிறேன்

உதறி உதறி உள்ளேயே விழுகிறேன்

அப்போது பறந்த விசிலிற்கு

அந்த உதட்டை முத்தி எடுக்கவேண்டும்.

கோடி சொற்களைக் கொட்டும் இரட்டைக் குச்சியை

லுங்கிக்கட்டில் செருகிக் கொண்டு போகும்

திடுமுக்காரரே …

உன் அப்பனுக்கு

சிரட்டையில் தண்ணி ஊற்றிய பாவந்தான்

நான் இப்படி

ஒற்றைச் சொல்லிற்கு நாயாய் சாகிறேன்.

Comments

avainayagan said…

Great Thambi..!

April 28, 2014 at 11:10 PM

கரகரப்பின் மதுரம்

நான் முறைப்படி இசை பயின்றவன் அல்ல. ஆயினும் பாடகன். பெயர் கூட ‘இசை’. எவ்வளவு திமிர்? தமிழ்நாட்டில் எல்லோரும் பாடகர்தான். தன் வாழ்வில் ஒரு பாடலைக்கூட முணுமுணுத்திராத மனிதஉயிர்என்று எதுவும் இருக்காது. அதுவும் இளையராஜாவின் தேசத்தில் எல்லோரும்தான் பாட வேண்டும். எல்லோரும்தான் பறக்க வேண்டும். பாடல் என்பது கொஞ்சமாகப் பறப்பது. மனிதன் பாதசாரியானாலும் பறக்க விரும்புவன்தான். அவன் அத்தனை நெரிசல்களுக்கிடையே நடந்து நடந்து சலிப்பவன். எனவே சமயங்களில் அத்தனையையும் விட்டுவிட்டு அவன் பறக்கத்தான் வேண்டும். நான் பாத்ரூம் ஓட்டை வழியே பறந்து வானத்திற்குப் போய்விடுபவன். என்னை வானத்தில் ஏற்றிவிடும் அம்மையப்பன் இளையராஜா. எனக்கு ராஜாவின் இசையைப் போலவே அவர் குரலும் அவ்வளவு பிடிக்கும். ஆனால் ஏன் பிடிக்கிறது என்பதுபற்றி இதுவரை யோசித்ததில்லை. ஆராய்ந்து பார்த்ததில்லை. ஆராயவும் தெரியாது. ஆராயத்தெரியாதுஎன்பது அருவியின் முன் ஒரு சலுகை. குடைந்து குடைந்து நீராட வேண்டியதுதான். ராஜாவின் இசையைப் போற்றிப் புகழும் சிலருக்குக்கூட அவர் குரல் உவப்பானதாய் இருப்பதில்லை. கொஞ்சம் இசை அறிந்த நண்பர் ஒ...

மயிலுக்குத் துடிப்பவன் மனைவிக்குச் சுடுபவன்

கபிலர் கவித்துவத்திரட்டின் அடுத்த கட்டுரை அகழ் இதழில் வெளியாகியுள்ளது. இந்தக் கட்டுரையுடன் கபிலரின் புறப்பாடல்கள் நிறைவடைகின்றன. இனி முழுக்கவும் அகப்பாடல்கள்தான். .. மயிலுக்குக் குளிரும் எனும்படிக்கு இரக்கம் கொண்டவனால் , மனைவிக்குக் கொதிக்கும் என்பதை அறியமுடியவில்லையா? அது அப்படித்தான். விசேஷமான ஒன்றில் ஆகச்சிறந்தவராய் விளங்கும் ஒருவர் , சாதாரண ஒன்றில் தடுமாறிச் சரிவதை நாம் காலகாலமாக பார்த்து வருகிறோம். மயிலுக்கு இரங்கி, மனைவிக்கு இரங்கா மாண்பை எந்தச் சோதனைக் கூடத்தில் இட்டு பரிசோதிப்பது? எவ்வளவு ஆய்ந்தாலும் அதில் குழப்பமான முடிவுகளே வரக்கூடும். மேலும் காமம், எதிலும் துளையிட்டுவிடும் ஒரு ராட்சத இயந்திரம்... முழுவதும் வாசிப்பதற்கான இணைப்பு கீழே உள்ளது https://akazhonline.com/?p=12302

ஒளி வளையத்துள் ஒரு தூசு

மு துகெலும்பு வெளிக்கிளம்ப தவமியற்றல் அவசியமில்லை. ஞானமடைய எளிய வழிகள் நிறைய உண்டு அதிலொன்று ICU வில் கிடத்தல் அதுவும் அம்மணமாய்க் கிடத்தல் 'நிர்வாணம் அடைதல் ' என்பதை ஆகச்சிக்கலான தத்துவம் எனக்கருதி பயின்று பயின்று குழம்பிக் கொண்டிருந்தேன். உடலில் ஒன்றுமில்லாதபோது எதிலும் ஒன்றுமில்லை என்பது விளங்கத் துவங்கிவிடுகிறது கண்களில் பீளைகட்டியிருக்கும் போது நன்றாகவே தெரிந்தது என் தலை சுற்றி ஓர் ஒளி வளையம் கண்ணில் பீளை என்பதால் உதித்த வளையம் என்னால் இப்போது சித்தார்தனுடன் அமர்ந்து ஓரளவு உரையாட முடியும் ஆயினும் ஞானத்தின் மீது ஒரு சின்னதூசாய் 'ஹேமா' என்கிற ஒரு பெயர் நண்பர்காள்.. முந்தைய ஜென்மத்தில் மான்களாகப் பிறந்தால் மட்டுமே இந்த ஜென்மத்தில் செவிலியராய் பிறக்க இயலும். இது ஒரு ஞானம் அவ்வளவு பெரிய சொல் வேண்டாம் எனில் இது ஒரு உண்மை

கவிஞர் இசை

Search This Blog