அ றுவை சிகிச்சை முடிந்து ஆயுள் முழுதும் உபயோகிக்க வேண்டுமென பரிந்துரைக்கப்பட்ட கண் மருந்தை வாங்கி வருவதற்காக அவர் கிளம்பிக் கொண்டிருக்கிறார் "துணைக்கு வரவா" ? என்று கேட்ட மனைவியின் குரலை முறைத்து விட்டு நடக்கிறார் பழமை வாய்ந்த அந்த மருந்துக் கடையில் அரசுப் பணியில் சேரும் முன் நான்கு வருடங்கள் அவர் சிப்பந்தியாக இருந்துள்ளார். அவர் கடையை அடைகையில் அந்தப் பையன்தான் முன்னே நின்று கொண்டிருந்தான். அவன் மேலும் கீழும் போகிறான். அங்கும் இங்கும் தாவுகிறான். கடை மூலையில் ஸ்டைலாக சாய்ந்து கொண்டு மருந்துகளை விட்டுவிட்டு வேறொன்றைச் சிந்திக்கிறான். வேறு ஸ்டைலான இடத்திற்குப் போய்விட்டு கடைக்குத் திரும்புகிறான். பில் வரிசையில் தனக்கு முன் நிற்கும் பெண் ஊழியரிடம் அவள் மட்டும் கேட்கும் படி என்னவோ கிசு கிசுக்கிறான். அவளோ அவன் கிசுகிசுக்கும் முன்னரே நாணத்தின் பிரகாசத்தோடு நின்று கொண்டிருந்தாள் மருந்தையும் , மீதிப் பணத்தையும் முன் வைத்துவிட்டு திரும்ப எத்தனிக்கையில் அவன் சட்டையைப் பிடித்து அதை உருவிவிடும் ஆவேசத்தோடு அவர் ஒரு இழு இழுக்கிறார்.