மானுடமே!

 

எங்கோ கணக்கு பிசகிவிட்டது. அதைச் சரிக்கட்ட  எத்தனையெத்தனை தெய்வங்கள் ஒரு ஆதிதெய்வம் அதற்கு ஒரு துணை தெய்வம் அதைச் சுற்றி  சில தெய்வங்கள் அதன் வழி நூறு தெய்வங்கள் இந்தத் தெய்வங்களைப் பின்னி கொட்டிக் கவிழ்க்கப்படும்  கொத்துக் கொத்தான கதைகள் அந்தக் கதைகள் சொல்லும் ஆகச் சிக்கலான நீதிகள் பெரிய தெய்வங்களோடு பேச முடியாதவர்களுக்கென எண்ணற்ற  குட்டித் தெய்வங்கள் தெய்வமில்லை ஆனால் தெய்வம் போல என்பதாக சில பாதி தெய்வங்கள் தெய்வங்களை விரட்டியடிக்கப்போவதாக சூளுரைத்து வந்து நின்ற அறிவியல் தொங்கிய தலையுடன் பின்வாங்கிய போது ஆங்கு முளைத்தெழுந்த ஆயிரமாயிரம் தெய்வங்கள் தெய்வமே இல்லை என்று வாதாடும் மூர்க்கர்களுக்கென செய்து வைத்த சில வேறு தெய்வங்கள் அபாரம்...! அபாரம்....! இப்போது  கணக்கு சரியாகி விட்டதா மானுடமே?