Friday, May 11, 2018

நன்றியுணர்ச்சியில் தவித்தல்



                                                 






அந்த மனிதனுக்கு ஒரு நெருக்கடி
உடனடியாக
நன்றியுணர்ச்சியிலிருந்து வெளியேறியாக வேண்டும்
அது ஒன்றும் அவ்வளவு பெரிய உதவியில்லை... 
அளவில் சிறியதுதான் என்று
எவ்வளவோ முறை தனக்குத் தானே
சொல்லிக் கொள்ளத் துணிகிறார்
அடுத்த கணமே
" காலத்தினாற் செய்த நன்றி " எனும் வரியால்
 கடுமையாகத்  தாக்குறுகிறார்
நன்றியுணர்ச்சி
எவ்வளவு வலுவானதொரு மிருகம் ...
இவரோ 
ஒரு  காக்கையைத் துரத்துவதைப் போலே
" உஸ்" உஸ்"  என்கிறார்.
அது ஒரு வட்டமடித்து விட்டு
திரும்பவும் வந்து
இதயத்தின் கூரையில் அமர்ந்து கொள்கிறது.
நன்றியுணர்ச்சி
 ஒரு நாகத்தைப் போலே
 " புஸ்.." " புஸ்..." என்று சீறிக் கொண்டிருக்கிறது.
இவரோ ஒரு மோசமான அப்பாவி
அதன் வாலைப் பிடித்து இழுக்க முயல்கிறார்.

No comments: